Í síðstu viku stóð eitt lesarabræv í einum at tíðindabløðunum, har fólk vísa sína ónøgd við, at ringt er at koma til lyftuna umborð á Teistanum, tá mann  má standa í bíðirøð saman við hinum bilunum og er rørlutarnaður og má fáa serlig pláss tætt við lyftuna.
 
MBF hevur fingið líknandi áheitanir fyrr, og hava vit gjørt vart við hetta hjá umsitingini á SL. Vit høvdu fund við táverandi leiðsluna á SL, har vit kunnaðu um tær klagur vit høvdu fingið og hvussu vit hildu málið kundi loysast.
 
Uttan at vit skulu blanda okkum í hvussu innanhýsis mannagongdirnar eru umboð á strandfaraskipunum tá teir taka bilar umborð, mæltu vit tó til at man gjørdi serligar reglur fyri bilar har fólk ið eru rørslutarnað skulu umborð, so hetta varð gjørt við serligari frámerking av parkering á landi eins og framman fyri lyftuna umborð.
 
MBF ynskti at parkeringpláss varð gjørt á ferjuleguni til rørslutarnað, so at manningin umborð beinanveg sær, at her var ein sum skuldi fram til lyftuna. Hetta fyri at fólk skuldi sleppa undan at rópa og royna at gera vart við seg tá tey koyrdi umborð. Tá er eisini ov seint at skipa røðirnar av bilum um ein av bilunum skal hava serligt pláss tá umborðkoyring er byrjað.

Fólk sum ferðast ofta og nøkur dagliga, ilskast inn á støðuna, og tað er onki at siga til tað, tí hetta er smáting sum saktans kundi verið gjørd uttan stórvegis hóvasták.
Onki er so troyttandi sum tað at skula endurtaka seg sjálvan ferð eftir ferð og dagliga biðja um at fáa atkomuligt pláss, sum skuldi verið ein sjálvsagdur rættur.
MBF hevur gjørt vart við, at lógin verður brotin hvønn dag, tí ikki er loyvt at sita á bildekkinum meðan ferjan siglir.
Tískil fara vit enn einaferð at heita á SL um at fáa hesi viðurskifti í rættlag sum skjótast.

Leila Solmunde, forkvinna í MBF