MBF -  samvitskan hjá myndugleikunum

-At virka fyri at bøta um kor teirra brekaðu, hevur MBF m.a. gjørt við at vera samvitskan hjá okkara myndugleikum, segði Eyðun Mohr Hansen, aðalstjóri í Almannamálaráðnum, sum bar føðingardagsheilsu fram vegna almenna myndugleikan. Tað var ikki tí at Rósa Samuelsen, landsstýriskvinna við almannamálum, ikki var til staðar, ella ikki sjálv hevði hug at heilsa MBF, men løgtingsval stóð beint fyri durum, og siður er, at tá siga politikararnir sum minst í tílíkum høpi.

Aðalstjórin takkaði oddafólkunum í MBF fyri gott samstarv m.a. gjøgnum arbeiðið í Ráðnum fyri Brekað, í Happadráttargrunninum og annars í sambandi við lógarfyrireikingararbeiði. Hann legði dent á tað konstruktiva samstarvi, sum alla tíðina hevur verið borið uppi av ídnum umboðum fyri felagið, tá vart skuldi gerast við korini hjá fólki við breki, m.a. við sínum virkna leikluti í norðurlendska handikapráðnum. Eisini tann vegin hevur MBF givið politisku myndugleikunum íblástur til at betra um korini hjá fólki ið bera brek, segði Eyðun Mohr Hansen, sum vegna manningina í Almannamálaráðnum ynskti MBF blíðan byr í framhaldandi arbeiðinum.